التليفون رن للمره الثانيه وانا شغال على التجربه بتاعتي
انت في الصفحة 1 من 7 صفحات
فلاش_باك
الحلقة_الأولى
التليفون رن للمرة التالتة وانا شغال على التجربة بتاعتي وكنت خلاص قربت اوصل لحاجة في المعادلة الأخيرة رنة التليفون فصلتني وشتت تفكيري وكل الخيوط اللي جمعتها فجأة اتلخبطت مني زي سلك التليفون اتعصبت جدا عموما دي غلطتي تاني مرة مش لازم اخد الموبايل معايه في المعمل بصيت على الساعة لقيتها بقت 3 الفجر يااااه محستش بالوقت خالص انا مش متخيل اني هنا من الساعة تسعة بالليل شغال على المعادلة كنت وصلت لنتايج مهمة جدا بس الزفت الموبايل ضيع كل حاجة ..
غريبة جدا اول مرة سمية تكلمني من سنة ونص من ساعة ما اتطلقنا ايه الحكاية تكونش دي الهرمونات بتاعة الستات بعد نص الليل ..
رديت طبعا بتقل الدنيا مع اني كنت فرحان ومش مصدق نفسي اصلا ان سمية رجعت تكلمني ..
حاولت اظبط نبرة صوتي كدا عشان مبانش قدامها مدلوق وبتاع ورديت ..
مسمعتش غير صړخة طويلة جدا وسمية بتقول الحقني يا حسن وبعد كدا التليفون اتقفل خالص ..
وقفت لمدة دقيقة في حالة ذهول وحاسس ان دماغي اتشلت ومش عارف استوعب ..
سمية كانت بتصرخ في التليفون وبعدين تليفونها اتقفل ايه اللي حصلها ..
بعد حوالي دقيقة لما بدأت افوق من الصدمة خدت بالي ان الرقم اللي سمية كلمتني منه رقم تليفون ارضي مش موبايلها بس هو ظهر على تليفوني باسمها عشان هو متسجل كدا على الترو كولر ..
المصېبة دلوقتي اني مش عارف المفروض اعمل ايه ..
مفيش غير ايهاب هكلمه اشوفه فين ..
ايوه يا ايهاب
ايوه يا أينشتاين
انت فين
طبعا ما انت بتنزل المعمل بتنفصل عن الواقع متعرفش الناس اللي عايشة معاك في البيت راحوا فين ولا جوم منين
انا في القسم عندي نبطشية النهارده خير يا حسن قلقتني ماما حصلها حاجة
لا لا ماما كويسة اطمن بس سمية هي اللي حصلها حاجة
سمية مالها سمية انتو رجعتوا تتكلموا تاني
مش وقته يا إيهاب انا جايلك القسم دلوقتي لما اجيلك نبقى نتكلم ..
ونزلت ركبت عربيتي وطلعت بأقصى سرعة فيها على قسم العجوزة اللي بيشتغل فيه ايهاب اخويا ..
دخلت المكتب اتعدل في قعدته ونده على العسكري
شوف يا ابني الدكتور حسن يشرب ايه
مش هشرب حاجة يا ايهاب انا مش جاي اتضايف
طب روح يا ابني هاتله لمون ساقع وهاتلي انا نسكافية
مش عايز حاجة يا ايهاب قولتلك
يا عم كوباية لمون حلوة كدا تروق دمك شكلك متوتر اوي ايه بقى فيه ايه مفهمتش منك حاجة في التليفون
سمية يا ايهاب
مالها سمية ايه اللي حصلها
مش عارف
مش عارف لا إله إلا الله مالك يا عم حسن يعني انت فجأة كدا حسيت ان قلبك واكلك عليها وللا ايه مش فاهم
يا ايهاب سمية كلمتني وكانت بتصرخ انا خاېف عليها يكون حصلها حاجة
واشمعنى كلمتك انت يعني معلش بص يا ابو علي انا خاېف عليك من حبستك في المعمل دي وسط الاحماض والتركيبات وانابيب الاختبار انت الموضوع بيوصل معاك لمراحل خطړ ..
يا ايهاب بطل سخافة يا اخي ومتندمنيش اني فكرت فيك الله بقولك أعصابي متدمرة من ساعة ما سمعت صوتها وهي بتصرخ و بتقولي الحقني يا حسن ومش عارف ايه اللي حصلها وانت ليك نفس تهزر
مش بهزر يا حبيبي والله انا بتكلم معاك بالعقل انا راجل ظابط شرطة وليا طريقة في التفكير مختلفة شوية عن اي حد عادي واللي انت بتسألني فيه دا صميم تخصصي يعني انا احسن حد يفيدك في موقف شبه دا واحدة بتتصل بواحد بعد نص الليل تصرخ وتقوله الحقني وبعد كدا تقفل التليفون يعني فيه خطړ داخل عليها وبينها وبينه ثواني معدودة وانت آخر أمل ليها في الدنيا تمام لوچيكال كدا يا عم حسن مكانش عندها وقت تقلب في الارقام اللي على موبايلها وتطلع رقمك من وسطهم وتكلمك انت بالذات حتى لو بتفكر فيك ليل ونهار التصور الأصح في موقف زي دا ان دا واحد غرقان بيتعلق في قشة ولو ربنا الهمه وعرف يمسك التليفون بيتصل بأول رقم ايده بتيجي عليه وأول رقم دا بيكون حاجة من اتنين يا آخر رقم هي كلمته يا أول رقم متسيف على موبايلها بالترتيب الابجدي وانت وهي مفيش بينكو كلام من ساعة ما انفصلتوا من سنة ونص ومستحيل تكون انت اول اسم على موبايلها ابجديا سواء كانت بتكتب الاسامي عربي او انجليزي انت اسمك حسن .. يبقى الموضوع كله فاكس ..
خلصت تحليلك يا سي شارلوك هولمز سمية مكلمتنيش من موبايلها كلمتني من تليفون ارضي ..
تليفون ارضي ازاي يعني كلمتك من الكشك اللي تحت العمارة
لو هرجت تاني هسيبك وامشي
خلاص انا اسف طب التليفون اللي كلمتك منه دا تيليفون البيت
لا مش تليفون البيت
امممممم طب انت عرفت منين انها سمية من صوتها بس يعني جايز حد بيعمل فيك مقلب
اوووف لا يا ايهاب هي سمية حتى التليفون اللي كلمتني منه متسجل على الترو كولر باسم سمية
طب دي ملاحظة مهمة جدا الكلام دا معناه ان المكان اللي كلمتك منه مكان مألوف بالنسبالها والتليفون اللي فيه استعملته قبل كدا وكلمت منه حد بدليل أن الحد دا سيفه عنده باسمها عشان كدا ظهر على الترو كولر باسمها
بالظبط وانا كمان لما كلمت مامتها على تليفون البيت كان باين على صوتها انها نايمة معنى كدا انها عارفة بنتها بايتة فين ومش قلقانة عليها
يا نهار اسود الحكاية شكلها بجد وللا ايه
امال انت فاكرني بهزر
طب بقولك ايه وريني تليفونك كدا واطلبلي الرقم اللي سمية كلمتك منه يمكن يكون اشتغل وللا حاجة
