انتي بټعيطي

إنت بټعيطي!
لا بعيط إيه ده بس عيني انطرفت.
افتحي الكاميرا.
أنا كويسه يا عبد الرحمن.
اتكلم بنرفزة وهو بيعيد كلامه تاني
بقولك افتحي الكاميرا.
فتحت الكاميرا وأنا بحاول أهرب بعيوني منه اتنهد وهو بيستغفر ربنا واتكلم بزعيق
هي تاني! إيه مبتزهقش أقسم بالله مفيش حد مانعني عنها إلا إنت هي إزاي كده دي مستحيل تكون أم.

خلاص يا عبد الرحمن.
قولتها وأنا بعيط وببعد وشي عن الكاميرا حطيت إيدي على بوقي أكتم صوت عياطي وشهقاتي اللي عليت اتكلم عبد الرحمن وهو بيحاول يهديني
خلاص اهدي يا نور عيني اهدي وكل حاجه هتتحل.
مفيش حاجه هتتحل يا عبد الرحمن أنا خلاص اتعودت على كده أنا بس مكنتش أتمنى إن أمي تكون كده.
مش عاجبك ولا إيه يختي.
قالتها مامتها وهي بترزع ف الباب وبتدخل عليها الأوضه اتكلمت شهد بحړقة ودموع
وأنا فإيدي إيه غير إنه يعجبني وأحط فبوقي جزمة قديمة وأسكت علشان مسمعش كلامك اللي زي السم فإيدي إيه أعمله غير إني أستحمل إهانتك ليا كل شوية ومقارنتك ليا بدي ودي أنا حاولت كام مره معاك يا ماما بس أنا مهما عملت هفضل وحشة طول عمري ف بالله عليك ارحميني علشان حرام عليك والله.
حرام عليا ليه يختي أنت مش شايفه نفسك عاملة إزاي.
ربنا يريحكم مني أنا عمري ما شوفت أم بتعمل فبنتها زي اللي بتعمليه فيا بجد.
إنت بتكلميني أنا كدة طب تعاليلي يا قليلة الأدب.
الحقتي يا عبد الرحمن.
آخر جملة قالتها وهي بتصرخ وبتستنجد بيا وبعدها الخط اتقطع معرفش وصلت لبيتهم إزاي فالوقت ده لقيت الجيران بيخبطو على باب شقتهم وهي صوت صريخها طالع من جوة ووالدتها بتتكلم بصوت عالي
ياريتك ټموتي وتريحيني يا بعيدة ربنا ياخدك.
خبطت على الباب أو تقريبا كنت بكسره فتحتلي وهي بتبصلي بقرف اتكلمت وهي بتشاور للي واقفين
خير يا جماعة إيه اللمة دي كلها! بنتي وبربيها.
اتكلمت واحدة من الستات اللي واقفين
بتربيها! ده أنت بتموتيها حرام عليك وبعدين تربي إيه الحتة كلها تشهد بأخلاق بنتك اتق الله ف بنتك حرام عليك.
زقيتها من على الباب ودخلت لقيتها مرمية على الأرض ودماغها بتجيب ډم قربت عليها وحاولت أفوقها بس معرفتش طلعت موبايلي واتصلت على عمار أخويا علشان يجيب العربية لأني جيت من غيرها اتكلمت بسرعة أول ما فتح الخط
عمار الله يرضى عنك هات العربية وتعالى على بيت شهد بسرعة المفاتيح هتلاقيها على الكومودينو اللي فأوضتي هاتها وتعالى فورا.
خير يا عبد الرحمن في إيه
مش وقت أسئلة يا عمار بسرعة.
خلاص أنا نازل أهو.
قفلت معاه وأنا ببص عليها غمضت عيني على شكلها اللي دبل خالص فتحت دولابها وجبت ليها إسدال لبسته ليها وعدلتها على السرير أخدت ليها طقمين وكل حاجة هي بتستخدمها وحطيتهم فالشنطه قبل ما أقفل الدولاب لفت انتباهي دفتر صغير ومعاه قلم اخدته هو كمان وقفلت الدولاب استغفر ربنا لما سمعت صوت والدتها بتتكلم
جرا إيه يا خويا متخافش شوية وهتلاقيها صحيت هي بس اللي كانت عايزة تتربى من أول وجديد.
اتكلمت بنرفزه بعد ما سمعت كلامها
أنت إيه! بجد أنت إيه عرفيني أنت مستحيل تكوني أم طبيعيه مستحيل اللي بتعمليه فبنتك ده اللي حايشني عنك إنك ست وإلا كان زماني دغدغتك مكانك.
تصدقك إنك قليل الأدب وشكلها أنعام معرفتش تربي هي كمان.
أنعام دي ربت راجل وقسما بربي ما هتعرفي اللي هيحصل لو فضلتي هنا ثانية واحدة وآه صحيح انسي إن عندك بنت اسمها شهد نهائي وخلي خالي المصون هو كمان ينسى.
قربت من السرير شيلتها ونزلت لقيت عمار فاتح العربية