هو انتي مفكراه هيحبك بشكلك ده

الصحبه الطيبه ....
اسكريبت ..
وانتى مفكراه هيحبك بشكلك ده !
يعني ايه
يعني تقلعي الجيبات دى وتلبسي بناطيل وتبطلي الكسوف ده 
بس ..
بس ايه أنا أقدم منك في الكلية وعارفه كل حاجه وكمان عارفه الولاد بيعجبهم ايه من بكره تيجي لابسه بنطلون وتشيرت قصير وكمان متعمليش الطرحة كدا اعمليها زي طرحتي
تفتكري اني لما اعمل كدا هيحبني 
ايوا طبعا انتى قولتيلي بتحبيه من امتى 
من اول ما دخلت الثانوية
وهو محسش بأي حاجه ولا قولتيله 
لأ
انتى مجنونه يابنتي لازم تقوليله
بس هقوله ازاى مينفعش
يابااااااي عليكي بقولك ايه .. يلا نمشي دلوقتي وبكره نبقا نشوف حل في الموضوع ده

خلصت اول يوم كلية بعد ما اتعرفت على منال وحكتلها كل حاجه عني معرفش ليه حتي أدهم اللى محكتش لأى حد عنه قولتلها عليه وتقريبا دا كان من فرحتي لما شوفته معايا في نفس الكلية
روحت البيت لقيت ماما في وشي
هاا عملتي ايه في أول يوم كلية 
الحمد لله يا ماما بس كنت عاوزه أقولك حاجه
قولي ياحبيبتي
كنت محتاجه شوية فلوس أنزل اشترى طقمين
حاضر يا غفران لما أبوكي يرجع هقوله وان شاء الله ننزل نشتري سوا
دخلت اتوضيت وصليت وبعدين نمت وصحيت ع المغرب كدا
و لقيت ماما داخله وبتقولي
ايه رأيك ننزل نشتري هدوم دلوقتي 
لا يا ماما الصراحه واحده صاحبتي هتنزل تشتري معايا بكره هي عندها ذوق في اللبس شوية ف هنشترى مع بعض
خلاص ماشي يا حبيبتي الفلوس اهيه ولو اتحتاجتي حاجه تاني قوليلي
اخدت الفلوس منها وانا مبسوطة وقعدت افكر في ادهم وان لو الطريقه دي نجحت هبقا أسعد واحده في الدنيا
نمت وصحيت تاني يوم
لبست بنطلون كان عندي وعليه تشيرت قصير وعملت طرحتي زي منال يعني مبينه نص شعري تقريبا
انتى هتخرجي كدا يا غفران 
أيوا يا ماما فيها ايه كل صحابي لبسهم كدا
بس انا مربتكيش علي كدا
يا ماما بقا انا هتآخر ولازم أنزل دلوقتي سلام
قولتلها كدا
وخرجت ووصلت الجامعه وكانت أول مرة ألاقي كمية الشباب دى بتبصلي
حسيت نفسي جميلة اوى وقعدت أقول لنفسي ازاى كنت مبوظه شكلي كدا الحمد لله ان منال فهمتني عشان كدا ادهم مكنش بيبصلي حتي
سمعت صوت صفارة قطعت عليا تفكيري
منال !!
ايه الشياكه دي 
بجد يعني شكلي حلوو 
جاحده
طيب تفتكري ان أدهم هيلاحظني
يابنتي الجامعه كلها لاحظتك دا هيجيلك واقع من بصه منك بس
فرحت جدا من كلامها وبعدها لقيت بنت منتقبه جايه علينا وبتقولي
ممكن أتكلم معاكي شوية يا آنسه 
لقيت منال ردت آنسه خيمة هانم ! نعم عاوزه ايه
أنا طلبت أتكلم مع الآنسة دي مش معاكي
طيب يلا بقا من هنا هي مبتكلمش حد
قالت كدا للبنت وشدتني من ايدي وروحنا مكان تاني
هي مين دي 
واحده هبلة كدا فكك منها عامله نفسها متدينه اوى وماشيه توعظ في خلق الله ويا عالم لابسه النقاب ليه 
حرام عليكي متقوليش كدا
مش هنتكلم في الحلال والحرام دلوقتي
يلا عشان نحضر