((نيروز والهوى))

حقيقي تتحب ولطيفة جدا وروحها حلوة الفترة دي كانت هي وإيهاب كل يوم ينزلوا ويجيبوا الحاجات اللي ناقصة واللي محتاجنها في بيتهم ..وعلاقتهم كانت حلوة ببعض أما عن علاقتي أنا وإيهاب فاكانت عادية ..مافيش إحتكاك بينا كتير لحد ماحصلت حاجة غريبة أوي قبل فرح إيهاب وهبة ..اليوم دا صحابه كانوا عاملين له حفلة بمناسبة رجوعه من السفر وبمناسبة جوازه وأخد هبة معاه ..المهم أنا كنت قاعدة في أوضتي وجهاد قاعدة معايا وإتفاجئنا بوجود هبة إنها جت من الحفلة والظاهر انها متضايقة .. 

نيروز إيه دا فيه إيه ..فيه إيه ياهبة مالك وراجعة بدري ليه من الحفلة 
هبة بضيق إتضايقت وجيت
جهاد إتضايفتي من إيه وإيهاب رجع معاكي ولا لا 
هبة بسخرية لأ ..البيه لسة هناك
نيروز إنتوا إتخانقتوا ولا حاجة 
هبة ماتخانقناش بس ..حصل موقف ضايقني أوي هناك
نيروز موقف إيه 
هبة فيه حد في الحفلة من صحابه تعدي حدوده معايا في الكلام قدام إيهاب ونظراته ليا وحاجة مقرفة ..وهو كان شايف دا وساكت ! أنا ماضايقنيش حركات صاحبه قد ماضايقني سكوته !
نيروز ومالفتيش نظره 
هبة لفت نظره وقولتله علي صاحبه دا وحركاته اللي مش مظبوطة معايا تخيلي قالي إيه قالي إن أنا بوهم نفسي وإن دا ماحصلش !
هزيت راسي وسكت ! رد فعل متوقع من إيهاب .. 
جهاد سبحان الله ..وكإن الزمن بيعيد نفسه
نيروز جهاد ! إسكتي
هبة تسكت ليه فيه إيه ..زمن إيه اللي بيعيد نفسه فهموني تقصدوا إيه 
جهاد ماهو لنفس السبب نيروز إتطلقت من إيهاب ! عشان مش بيغير عليها !
ماكنتش حابة إن جهاد تقولها علي سبب طلاقنا لإن إيهاب مش عايز يوضح دا ليها وهما أحرار مع بعض ..وقررت أعاتب جهاد بيني وبينها عاللي قالته لكن لما جهاد قالت كدة هبة سكتت تماما مانطقتش وفضلنا ساكتين كلنا شوية لحد مابصتلي هبة وقالتلي ..
ودا كان سبب كفاية إنكوا تتطلقوا 
بتنهيدة إنتي شايفة إيه 
كان فيه بينكوا حب بقالوا سنين طويلة إنتهي عالموقف دا !
أيوة طبعا مابيغرش عليا !..عادي عنده يشوفني واقفة مع حد من صحابه أو حد يبصلي بجرآة أو يتطاول معايا في الكلام وهو شايف ان دا عادي وإشطا يظهر السنين اللي عاشها برا غيرته وخلته نسي مبادئه ودينه ..ماكنتش أقدر أعيش معاه ولا أقبل إنه يكون أبو ولادي 
وسكت ! قطعت الكلام لما حسيت إني هغلط فيه قدام اللي كلها أسبوع وتبقي مراته ! ماينفعش أقول كدة وماينفعش هي كمان تكون هادية بالشكل دا وتسمع مني ! فاأخدت نفس عميق وقولتلها ..
علاقتي أنا وإيهاب إنتهت من زمان وأنا بحترمه جدا وبقدره ودايما بتمناله يبقي مبسوط في حياته الحكاية إننا طلعنا ماننفعش لبعض ..كل واحد فينا له طريقة تفكير معينة ومختلفة عن التاني وخلاص اللي بينا خلص لا بقيت بحبه ولا بقا يحبني وهو خلاص هيبدأ حياته الجديدة معاكي وإن شاء الله ربنا يسعدكوا سوا إنتوا الاتنين تستاهلوا كل خير حقيقي
كانت ساكتة بتسمع وبس ! لحد ماقالت حاجة غريبة ومصدمة بالنسبالي أوي ..
كنت دايما بسأل نفسي سؤال واحد من ساعة ماعرفت إيهاب ليه بعد الحب الكبير اللي كان بينكوا دا تسيبوا بعض وليه إخترني أنا بالذات ..أنا مختلفة عنك في كل حاجة سواء داخليا أو