((نيروز والهوى))

حاسة بإهانة شديدة نص ساعة والأصوات هديت وجهاد جتلي وفضلت تهديني وفهمتني إن هبة فركشت الجوازة إنهاردة بعد خروجنا من البيت وقالتله السبب إنه مش بيغير عليها زي ماهو ماكنش بيغير عليا وودته درس في أخلاق الرجال قبل ماتمشي ودا كان سبب ڠضب إيهاب مني إن أنا قولتلها سبب طلاقنا رغم إن جهاد هي اللي قالت ! والمحاضرة اللي سمعتهاله كان كلامي أنا ! ..رغم ان انا ماغلطتش فيه قدامها بالعكس كبرته وهو مايستحقش دا ! ..وياريته بيتعلم ..

إيهاب قعد فترة مكتئب مابيخرجش ! وواحدة واحدة رجعت حياتنا زي الأول بس المختلف وجود إيهاب فيها ..لما كنا بنشوف بعض أو نتقابل صدفة عالسلم ماكناش بنكلم بعض ولا حتي سلام ولا حتي بنبص لبعض بنتغافل وجود بعض ..وبعد كدة مشيت الحياة عادي وإيهاب إستلم شغله من تاني في الشركة بتاعته هو ومصطفي ورجع لحياته ونسي هبة الجديد في الفترة دي إني إتخطبت ! ..جمال ! راجل كويس ومحترم ومهذب عريس مناسب جدا فاوفقت عليه ..عملنا حفلة خطوبة في جنينة البيت ماحضرش إيهاب ماهمنيش نهائي ..وجوده من عدمه مايفرقش معايا لكن جدو اللي زعل منه مع ان المفروض أصلا أصلا مايكونش موجود لانه طليقي ..بس عادي مانا كنت هحضر فرحه ..بعد الخطوبة بكام يوم جدو طلبني عنده في شقته نزلتله وإستغربت وجود إيهاب واكتشفت إن جدو جايبنا عشان يصالحنا علي بعض ..إيه دا إحنا عيال ! وخلاه يعتذرلي عن اللي قالهولي يومها ومسكته لإيدي وزقه ليا ! ..
حصل خير مافيش حاجة
وفجأة وبدون سبب واضح جدو سابنا لوحدنا ! ..فضلنا ساكتين شوية وبعدين قال إيهاب ..
ألف مبروك عالخطوبة
الله يبارك فيك عقبالك
إن شاء الله سمعت إنه راجل كويس ومحترم وإبن ناس
بإبتسامة الحمد لله
ربنا يسعدكوا وأتمني يكونلك الزوج اللي أنا ماعرفتش أكونهولك !
إيه دا بقا !! أقوله إيه ..في لحظة غير الموضوع وبقينا بنتكلم وخلاص إتصالحنا وبدأت معركة جديدة وغريبة ..إيهاب بيتعامل معايا عادي وبيكلمني وبيهزر معايا عادي جدا ..هو كان قادر يتعامل علي اننا صحاب مثلا او زي أي إتنين ولاد عم ..لكن أنا الموضوع مضايقني جدا أنا عمري في حياتي ماتعاملت مع إيهاب علي انه ابن عمي ..عمري ماشوفته غير انه حبيبي وهيبقي جوزي ولما كل دا إتهد مش هعرف أتعامل معاه علي إنه إبن عمي !! الاحساس نفسه غريب أصلا ..والكلام مابينا بقا ماينفعش لانه طليقي ! وأنا مخطوبة ..! ..
بصوا بقا ..
الحياة إختلفت 180 درجة رجعت لنقطة الصفر من تاني ولوحدي ! حوالي ست شهور عدوا علينا ماكنتش عارفة أحب جمال ..هو إنسان جميل بكل ماتحمله الكلمة من معني لكن مش عارفة أحبه قلبي مش جاي ..
قلبي الغبي متخلف .. خۏفت لما لقيتني مش عارفة أحبه وخۏفت أكتر لما في مرة وإحنا قاعدين إيهاب كان بيحكي موقف مع واحدة زميلته في الشركة وحسيت بنغزة في قلبي ! حسيت إني بغير عليه ! .. كنت عايزة أقتل نفسي عايزة أجيبني كدة وأضربني مية قلم واجرجرني من شعري مصېبة لو طلعت لسة بحبه ..مصېبة سودة ! وكإن قلبي لا بيعرف يحب ولا يروح لغيره بس أنا كنت عاذرة نفسي ااه أنا معذورة ..انا في حياتي كلها ماشوفتش راجل غير إيهاب ماشوفتش حد ينفع يكون جوزي غيره ..
ااه نسيته وتجاوزته وأول ماجه ماكنتش مهتمة